Hamas yarekuye imfungwa 20 mu rwego rwo gushyira mu bikorwa amasezerano yo guhagarika intambara na Israël

Itsinda rya mbere rigizwe n’abantu barindwi ryageze muri Israël, abandi 13 bakaba bagejejwe kuri Croix-Rouge ngo nabo bajyanweyo nyuma. Abarekuwe barimo Eitan Mor, Gali Berman, Ziv Berman, Omri Miran, Alon Ohel, Guy Gilboa-Dalal na Matan Angrest.

Iyi ni intambwe ya mbere y’amasezerano y’umushinga w’amahoro muri Gaza wateguwe na Leta Zunze Ubumwe za Amerika.

Mu gitero Hamas yagabye ku itariki ya 7 Ukwakira 2023, abantu 1.195 barishwe naho 251 barafatwa bugwate. Mu bantu 47 bari bagifitwe na Hamas, 20 gusa nibo bikekwa ko bakiri bazima.

Mu gihe cy’imyaka ibiri iyi ntambara imaze, ibikorwa bya gisirikare bya Israël byahitanye abasaga 60.000, barimo abagore n’abana benshi. Ibi byiswe “jenoside” n’ibigo mpuzamahanga bitandukanye birimo n’ibya Loni.

Abagize Forum des familles des otages nibo babimburiye abandi kwizihiza amakuru yo kurekurwa kw’izi mfungwa, bavuga ko urugamba rwo kugarura abari bagifitwe rudahagarariye aho.

Ku rundi ruhande, hateganijwe kurekurwa n’imfungwa z’Abanyapalestina 1.950 zirimo abana 22, muri gahunda ihuriweho n’impande zombi.

Ibi byose birimo kuba mu gihe hategurwa inama ikomeye mu mujyi wa Charm el-Cheikh mu Misiri, aho amasezerano yo guhagarika intambara azashyirwaho umukono. Abakuru b’ibihugu hafi 20, barimo Perezida wa Amerika Donald Trump, bazitabira iyo nama.

Uyu mushinga w’amahoro uteganya ko Hamas izarekura imfungwa zayo, Israël ikarekura iz’Abanyapalestina, hanyuma mu yindi migabane y’amasezerano Hamas igasabwa gushyira intwaro hasi burundu.

Nubwo bimeze bityo, abasesenguzi bavuga ko hakiri ibibazo bitarasobanuka birimo uzagenzura agace ka Gaza n’uko amahoro arambye azagerwaho hagati y’impande zombi.