Umusirikare wo mu ngabo za Uganda (UPDF), Staff Sergeant Muhindo Johnson, yapfuye azize ibikomere yakomerekeye mu gitero cy’abagabo bitwaje intwaro bagabye ku borozi b’amafi bo kuri Rweshama Landing Site, ku nkengero z’ikiyaga cya Edward, mu karere ka Rukungiri mu burengerazuba bwa Uganda.
Nk’uko byatangajwe na Major Kiconco Tabaro, umuvugizi w’ingabo za UPDF mu ishami rya kabiri ry’ingabo zo ku butaka, iki gitero cyabaye ku wa 1 Ukwakira 2025, ubwo itsinda ry’ingabo ryoherezwaga mu bikorwa byo guhangana n’abasahuzi bivugwa ko bari barimo kwambura abarobyi.
Major Tabaro yavuze ko Staff Sergeant Muhindo, wari uyoboye iryo tsinda ry’ingabo, yakomeretse bikomeye ubwo barwanaga n’abo barwanyi, maze nyuma yaho agapfira mu bitaro kubera ibikomere yari yagize.
Yongeyeho ko ingabo za UPDF zikomeje ibikorwa byo gushakisha abagize uruhare muri ubwo bugizi bwa nabi kugira ngo bashyikirizwe ubutabera.
Kugeza ubu, nta bandi basivili cyangwa abarobyi batangajwe ko bahitanywe n’icyo gitero.
